Իրադարձություններ

"ՈՍԿԵ ԾԻՐԱՆ" ԿԻՆՈՓԱՌԱՏՈՆԻ ՆԱԽԱԳԱՀ,
ԿԻՆՈՌԵԺԻՍՈՐ ԱՏՈՄ ԷԳՈՅԱՆԻ ՈՒՂԵՐՁԸ

Առաջին իսկ տարվանից ես առնչակից եմ "Ոսկե ծիրան" կինոփառատոնին: Ինձ համար հուզիչ է ձեզ բարի գալուստ մաղթել Երևան, մի քաղաք, որն առաջին անգամ այցելեցի մոտ քսան տարի առաջ: Կինոյի ոգին և ավանդույթը խորապես դրոշմված են հայի հոգում. քանի որ այդ հոգին միշտ էլ այլևայլ մշակույթների իսկական խաչմերուկ է եղել: Նախորդ դարի արվեստի ձևերից ամենաշատը կինոն է ի զորու արտահայտել մարդու վիճակի նրբերանգները, և մենք հպարտությամբ ենք ձեզ բարի գալուստ մաղթում այս փառատոն, որն աճել է նման զարմանալի ու ակներև եղանակով:
Ամեն մի փառատոն առանձնակի ալքիմիայի արդյունք է` ֆիլմերի ընտրությունը համակցելով հրավիրված հյուրերի և կինոգործիչների յուրահատուկ էներգիայի հետ: Ես վստահեցնում եմ, որ ձեր անցկացրած օրերը Երևանում օգտակար կլինեն, քաղաքը զննելու ժամանակ կունենաք և կտեսնեք ֆիլմեր, որոնք կխթանեն ձեր երևակայությունը: Փառատոնը ֆիզիկական իրողություն է, բայց և խորհրդավոր իրադարձություն, որ տեղի է ունենում յուրաքանչյուր անհատ մասնակցի հոգում շրջակա աշխարհի անձանց և պատկերների հետ փոխազդեցության մեջ մտնելիս: Հաճելի ուղևորություն ձեզ: Համեցեք այս հինավուրց հող։

"Միասին ֆիլմեր նկարահանենք" Հայաստան-Թուրքիա կինոպլատֆորմի նոր նախաձեռնություն

Երևանի «Ոսկե ծիրան» միջազգային կինոփառատոնի և Ստամբուլի "Անադոլու Քյուլթուր" կազմակերպության համատեղ նախաձեռնությամբ սույն թվականի ապրիլի 8-ից 10-ը Ստամբուլի միջազգային կինոփառատոնի շրջանակներում կայացավ Հայաստան-Թուրքիա կինոպլատֆորմի հերթական աշխատանքային հանդիպումը՝ "Միասին ֆիլմեր նկարահանենք" վերնագրով։ Երկու երկրում հայտարարվել էր կարճամետրաժ ֆիլմերի (խաղարկային, վավերագրական և անիմացիոն) նախագծերի մրցույթ։ Դրանք պիտի լինեին Հայաստանի և Թուրքիայի, երկու երկրների ներկայի և անցյալի, այնտեղ ապրող մարդկանց, նրանց հույզերի և երազանքների մասին։

Հայկական կողմը ստացել էր 15 նախագիծ, թուրքականը՝ 40։ Ստացված հայտերից ընտրվեց 10 նախագիծ, 5-ական` ամեն երկրից, որոնցից 4-ը ստամբուլյան հանդիպման արդյունքում պիտի ստանային զարգացման եւ նկարահանման համար դրամաշնորհ: Հայաստանը ներկայացնում էին հինգ երիտասարդ ռեժիսորներ` Դիանա Կարդումյանը, Մարիամ Օհանյանը, Գոռ Բաղդասարյանը, Արթուր Սուքիասյանը և Վարդան Դանիելյանը, ինչպես նաև Հայաստան-Թուրքիա կինոպլատֆորմ ծրագրի համակարգող Արծվի Բախչինյանը:

Ստամբուլում եռօրյա աշխատանքային հանդիպումների ընթացքում կազմված փորձագետների խումբը հայկական նախագծերից ֆինանսավորման արժանացրեց Դիանա Կարդումյանի "Գալաթա" և Գոռ Բաղդասարյանի "Հարևանները" ծրագրերը։ Առաջինը ստամբուլյան մի տեսարանի գեղարվեստական կինոպատկերումն է, իսկ երկրորդը ներկայացնում է հայ-թուրքական սահմանին գտնվող երկու գյուղ և դրանց բնակիչներին։ Եվս մեկ հայկական նախագիծ՝ Արթուր Սուքիասյան "Աղավնիների վարպետը"` Գյումրիում և Կարսում բնակվող աղավնապահների մասին, ստացավ մասնակի ֆինանսավորում։ Թուրքական կողմից լրիվ ֆինանսավորում ստացավ Գյուլենգյուլ Ալթընթաշի "Մի կորցրեք երեխաներին" խաղարկային կինոնկարի նախագիծը (սցենարիստներ՝ Կարապետ Օրունյոզ, Յուջե Յոնեյ), որ ներկայացնում է մի դրվագ Ստամբուլում գտնված Քեմփ Արմեն հայկական մանկական ճամբարի պատմությունից։ Մասնակի ֆինանսավորման արժանացավ Ջեմ Օզթուֆենքչիի և Մերյեմ Յավուզի "Ողջույն Հակոբից Շուքրուին" նախագիծը, որը պատմում է հայ-թուրքական սահմանին աշխատող հայ և թուրք երկաթուղայիննների մասին։

Աշխատանքային հանդիպման մասնակիցներից շատերը նախկինում մասնակցել էին "Ոսկե ծիրանի" նախաձեռնած միջոցառումներին եւ ծրագրերին, մասնավորապես "Ռեժիսորներ առանց սահմանների" եւ Հայաստան-Թուրքիա կինոպլատֆորմի սեմինարներին եւ աշխատանքային հանդիպումներին: Վերոհիշյալ Ջեմ Օզթուֆենքչին 2008-ին մասնակցել էր Երևանում կայացած Աբաս Քիարոսթամիի վարպետության դասերին եւ նկարահանել է ֆիլմ հայկական կինոխմբի մասնակցությամբ։

Նկարահանելիք բոլոր կարճամետրաժ ֆիլմերը կլինեն "Ոսկե ծիրանի" և "Անադոլու Քյուլթուրի" համատեղ արտադրությունը։ Նկարահանումները նախատեսվում է ավարտել մինչև 2011 թվականի հունվարի 30-ը։ Տարբեր թեմաներ ունեցող այդ կինոնկարները ծրագրված է համախմբել հայ-թուրքական կինոալմանախի ներքո։ Արդեն պայմանավորվածություն է ձեռք բերվել հայ-թուրքական համատեղ ֆիլմերը ցուցադրել 2011-ին Ստամբուլի միջազգային և "Ոսկե ծիրան" փառատոներում։

"Միասին ֆիլմեր նկարահանենք" ծրագիրը կզարգանա և իր տրամաբանական շարունակությունը կստանա Հայաստան-Թուրքիա կինոպլատֆորմի սցենարների և նախագծերի զարգացման երկրորդ աշխատանքային հանդիպման ժամանակ, որը կկայանա "Ոսկե ծիրան" 7-րդ կինոփառատոնի շրջանակներում (հուլիսի 11-18, 2010) և ամբողջովին կվերաբերի հայ-թուրքական համատեղ կարճամետրաժ ֆիլմերի արտադրությանը։ Օրերս կհայտարարվի հայտերի հավաքագրման հերթական փուլը։

Ասուլիսին մասնակցում են` «Ոսկե ծիրան»-ի տնօրեն Հարություն Խաչատրյանը, փառատոնի գեղարվեստական հարցերով տնօրեն Սուսաննա Հարությունյանը, ԱՄՆ դեսպանատան Հասարակայնության հետ կապերի պատասխանատու Թոմաս Միթնախթը, Հայաստան-Թուրքիա կինոպլատֆորմ ծրագրի համակարգող Արծվի Բախչինյանը, ինչպես նաև դրամաշնորհների արժանացած նախագծերի հեղինակներ Դիանա Կարդումյանը, Գոռ Բաղդասարյանը և Արթուր Սուքիասյանը։

Հայաստան-Թուրքիա կինոպլատֆորմի 2010 թվականի գործունեությունը ֆինանսավորում է Հայաստանում ԱՄՆ դեսպանատունը։