Շողակաթ Վարդանյանը պատմում է. «Իմ կրտսեր եղբայրը՝ Սողոմոնը, 21-ամյա երաժիշտ էր և շուտով պիտի ավարտեր պարտադիր զինծառայությունը, երբ 2020-ի սեպտեմբերի 27-ին Արցախում պատերազմ սկսվեց։ Պատերազմի 7-րդ օրը նա անհետ կորավ ռազմական գործողությունների գոտում։ Ես կինոռեժիսուրա երբեք չեմ սովորել, բայց ընտանիքիս ապրումները ստիպեցին, որ հեռախոսը ձեռքս վերցնեմ և տեսագրեմ մեր ամենօրյա փորձությունները։ Մենք պարզապես սպասում էինք եղբորս։ Ֆիլմ նկարահանելու մտադրություն չունեի։ Պատերազմի 44 օրերի ընթացքում մեր հոգիներում հույսն ու հուսահատությունը փոխարինում էին իրար։Դրանից հետո ես նկարահանեցի իմ ընտանիքի կյանքը ևս 2 տարի, երբ որոնում էինք, սպասում և տառապում։ Սողոմոնի մասունքները համարակալված էին 1489թվով՝ որպես «անհետ կորած անձի մարմին»։ Չնայած ամբողջ դառնությաանը՝ այս համարը մեզ համար դարձավ որոշակի ավարտ, որի կարիքը դեռ ունեն շատ ընտանիքներ։

Ստեղծագործական կազմը
Պրոդյուսեր՝ Շողակաթ Վարդանյան
Ռեժիսոր՝ Շողակաթ Վարդանյան
Սցենարի հեղինակ՝ Շողակաթ Վարդանյան
Օպերատոր՝ Շողակաթ Վարդանյան
Հնչյունային ձևավորող՝ Հայկ Իսրայելյան
Մոնտաժողներ՝ Տիգրան Բաղինյան, Արմեն Պապյան
Արտադրությունը՝ Շողակաթ Վարդանյան

Մրցանակներ
Լավագույն ֆիլմ, FIPRESCI-ի մրցանակ, Ամստերդամի վավերագրական կինոյի փառատոն, Նիդերլանդներ, 2023, Լավագույն վավերագրական ֆիլմ, Տրիեստի ԿՓ, Իտալիա, 2024, Հատուկ հիշատակում, Վավերագրական ֆիլմերի մրցույթ, Սոֆիայի ԿՓ, Բուլղարիա, 2024,Մեծ ժյուրիիի հատուկ մրցանակ, Full Frame ԿՓ, ԱՄՆ, 2024, Ժյուրիի հատուկ հիշատակում, GoEast ԿՓ,Վիսբադեն, Գերմանիա, 2024

Շողակաթ Վարդանյան       
Ծնվել է 1993-ին Երևանում արվեստագետների ընտանիքում։ Վեց տարեկանում որոշել է երաժշտություն սովորել և դաշնակահարուհի դառնալ։ Ավարտել է երաժշտական դպրոցը, կրթությունը շարունակել Երևանի Կոմիտասի անվան պետական կոնսերվատորիայում, որը 2014-ին ավարտել է որպես դաշնակահար։ Մասնակցել է դասական, ակադեմիական, ժամանակակից և փորձարարական նախագծերի՝ թե՛ որպես մենակատար, թե՛ անսամբլների կազմում, ինչպես նաև որպես նվագակցող ելույթ ունեցել Հայաստանում, ԱՄՆ-ում, Կանադայում ու Եվրոպայում։ 2017-ից ազատ իմպրովիզներ է անում և դարձել է Երևանի ժամանակակից ձայնի նվագախմբի անդամ։ 2020-ի սեպտեմբերին սկսվել է արցախյան 44-օրյա պատերազմը։ Երբ ընտանիքն այլևս լուր չուներ Շողակաթի կրտսեր եղբորից, որը կռվում էր առաջնագծում, նա վերցնելով հեռախոսը՝ սկսել է տեսագրել ընտանիքին։ Հենց այս տեսագրություններն էլ հետագայում դարձել են նրա կինոդեբյուտի՝ «1489»-ի հենքը: Շողակաթ Վարդանյանը երբեք ռեժիսուրաչի սովորել։ «1489»-ի համար 2021-ին նրան շնորհվել է ՀՀվարչապետի մրցանակը (որից հրաժարվել է՝ համարելով, որ ֆիլմը չպետք է որևէ քաղաքական առնչություն ունենա), իսկ 2022-ին նախագիծը որպես ընթացիկ աշխատանք Մեծ մրցանակի է արժանացել «Ոսկե ծիրան» ԿՓ-ում:

Ֆիլմացանկ
1489 (վավ․, 2023):