Հասուն կյանք մտնելու պատմություն է, որի դեպքերը ծավալվում են հետխորհրդային Կովկասի լեռներում` մի քանի սերունդ տևած պատերազմի ֆոնին։ Պատմության կենտրոնում 11-ամյա Վրեժն է, որն ապրում է Արցախի գեղատեսիլ գյուղում` վայրի բադերի ու ոսկեթև մեղուների հետ, և երազում ատամնաբույժ դառնալ։ Նրա անուշ եզերքում, սակայն, սփռված են նախորդ պատերազմներից մնացած ականները` գծանշելով աշխարհի կողմից դեռ չճանաչված մի երկիր։ Վրեժի կյանքը կտրուկ փոխվում է, երբ պատերազմը վերսկսվում է, և նա ստիպված ընտանիքի հետ հեռանում է Արցախից։ Հայրենի գյուղից հեռու Վրեժն իր օրերն անցկացնում է հաղթանակի անհամբեր սպասումով, բայց իրականությունն այլ կերպ է դասավորվում. հայերը պարտվում են պատերազմում։ Դեռ կանգուն հայրենի գյուղը վերադառնալով՝ Վրեժն ականատես է դառնում ավերածությունների, փոխված ուժային հարաբերակցության և հայրենասիրական կրթության, որը երեխաներին նախապատրաստում է հնարավոր նոր մարտերի։ Վրեժը պետք է սովորի պատերազմի օրենքները… Բայց նա կարո՞ղ է իր երիտասարտ ուսերին կրել մի ամբողջ ազգի սպասելիքները։ Ֆիլմն Արցախի ժողովրդի կտակն է, որտեղ հույսը և փորձությունները սերնդեսերունդ կոփել են նրա տոկոնությունը։

Ստեղծագործական կազմը
Պրոդյուսերներ՝ Ազզա Հուրանի, Սարին Հայրապետյան, Ժյուլի Բարաթյան (համապրոդյուսեր), Դեյվիդ Ռեյն (համապրոդյուսեր)
Ռեժիսոր՝ Սարին Հայրապետյան
Սցենարի հեղինակ՝ Սարին Հայրապետյան
Օպերատոր՝ Սարին Հայրապետյան
Կոմպոզիտոր՝ Տիգրան Համասյան
Հնչյունային ձևավորող՝ Թոմ Էֆինգեր
Մոնտաժողներ՝ Ռաֆայել Մարտեն-Հոլգեր, Սարին Հայրապետյան
Նկարահանվել են Վրեժ Խաչատրյանը, Անժելիկա Խաչատրյանը, Արման Խաչատրյանը, Անժելա Ազրյանը, Արտակ Խաչատրյանը, Գայանե Սարգսյանը:

Մրցանակներ
«Լուսարձակ» մրցանակ, Ամստերդամի վավերագրական կինոյի ՄԿՓ, 2024

Սարին Հայրապետյան         
Վավերագրական ֆիլմերի հորդանանահայ ռեժիսոր, որը հաստատվել է Միացյալ Նահանգներում։ Յուրահատուկ դիտողական ոճով ներկայացնում է անտեսվածների պատմությունները։ Հայրապետյանի ռեժիսորական առաջնեկը` «Մենք դեռ չենք ավարտել» ֆիլմը, 40-րոպեանոց վավերագրություն է հետտրավմատիկ սթրեսային խանգարումից տառապող ամերիկացի զինվորականների մասին, որոնք օգտագործում են պոեզիան որպես կազդուրման միջոց։ Ֆիլմն արժանացել է Սան Դիեգոյի GI ԿՓ-ի մրցանակին որպես լավագույն վավերագրական կինոնկար և 2018-ին առաջադրվել Վավերագրության միջազգային ընկերակցության մրցանակին «լավագույն կարճամետրաժ վավերագրական կինոնկար» անվանակարգում։ «Իմ անուշ երկիրը» Հայրապետյանի առաջին լիամետրաժ աշխատանքն է, որը ստացել է ITVS-ի (Անկախ հեռուստատեսային ծառայություն), ARTE-ի, Վավերագրության միջազգային ընկերակցության, Արվեստի և մշակույթի արաբական ֆոնդի (AFAC), Հորդանանի կինոֆոնդի, CNC-ի և այլոց աջակցությունը։ 2016-ին Սարին Հայրապետյանը հիմնել է իր HAI Creative կինոընկերությունը, որով մասնակցում է միջազգային համարտադրությունների և աշխատում այնպիսի կազմակերպությունների ու լրատվամիջոցների հետ, որպիսիք են Sesame Workshop-ը, HBO-ն, Wounded Warrior Project-ը, Apple-ը, Al-Jazeera-ն, «Ավրորա» մրցանակը և այլն։

Ֆիլմացանկ
Մենք դեռ չենք ավարտել (վավ., 2018), Արարատ լեռ. երկրորդ հնարավորություն (վավ., 2019), Մենք շարունակում ենք ապրել (վավ., 2024), Իմ անուշ երկիր (վավ., 2024):