Գիորգի Օվաշվիլի
1981-1986 թթ. ուսանել է Թբիլիսիի պոլիտեխնիկական համալսարանում: 1996-ին ավարտել է Վրաստանի կինոյի և թատրոնի պետական ինստիտուտը, իսկ 2006-ին՝ Հոլիվուդի Universal կինոստուդիայի նյույորքյան կինոակադեմիան: Պետական թատրոնի դերասան է եղել, մանկական ներկայացումներ բեմադրել և գովազդային գործակալության տնօրեն աշխատել: Նյու Յորքում հեռարձակվող «Վրացական տեղեկագիր» հեռուստածրագրի սցենարի հեղինակն է եղել: Նկարահանել է նրբաոճությամբ աչքի ընկնող մի քանի կարճամետրաժ ֆիլմ, որոնցից հիշարժան են «Տեսանկյունը» (Նյու Յորքի կինոակադեմիայի դրամաշնորհ 2015-ի Բեռլինալեում, Միջազգային ժյուրիի մրցանակ Օդենսեի ԿՓ-ում) և «Սայլակը» (Միջազգային ժյուրիի հատուկ մրցանակ Կիևի «Մոլոդիստ» ԿՓ-ում): Օվաշվիլու լիամետրաժ ռեժիսորական դեբյուտը`«Մյուս ափը» (2009), ներկայացվել է ավելի քան հիսուն երկրների հարյուրից ավելի միջազգային փառատոներում` շահելով մոտ հիսուն մրցանակ: Նրա երկրորդ լիամետրաժ ֆիլմը` «Եգիպտացորենի կղզին» (2014), արժանացել է Կարլովի Վարիի ՄԿՓ-ի «Բյուրեղապակե գլոբուս» մրցանակին: «Եգիպտացորենի կղզին» 2015-ին «Օսկար»-ի հավակնող ինը ֆիլերի ցանկում էր «լավագույն արտասահմանյան կինոնկար» անվանակարգում: Ֆիլմն այսօր արդեն ցուցադրվել է աշխարհի տարբեր երկրների 70-ից ավելի ՄԿՓ-երում` 33 մրցանակ շահելով:
Ֆիլմացանկ
Շատ կարճ պատմություն (կ/մ, 1993), Սայլակը (կ/մ, 1996), Պատրանք (կ/մ, 2000), Տեսանկյուն (կ/մ, 2003), Արևային երկրի ցայգերգը (կ/մ, 2004), Կապ (կ/մ, 2005), Մյուս ափը (2009), Եգիպտացորենի կղզին (2014), Խիբուլա (2017), Գեղեցիկ Էլենեն (2022):