Ջերեմի Թոմաս, պրոդյուսեր
Թոմասը մանկուց հաղորդակցվել է կինոաշխարհին, քանի որ նրա հայրն ու հորեղբայրը կինոռեժիսորներ են եղել ։ Նա սկսել է կինոլաբորատորիաներից, որից հետո ավարտել է մոնտաժի բաժինը, աշխատել է բազմաթիվ ֆիլմերի վրա և ի վերջո մոնտաժել ֆիլմ Կեն Լոուչի համար։ 1974 թ․ Թոմասը, որպես պրոդյուսեր, իր առաջին ֆիլմը նկարահանեց Ավստրալիայում՝ Ֆիլիպ Մորայի «Կատաղած շուն Մորգանը», որտեղ նկարահանվել է Դենիս Հոփերը, այնուհետև նա հիմնադրեց իր Recorded Picture Company ընկերությունը։ Թոմասը դրանից հետո նկարահանել է բազմաթիվ փայլուն ֆիլմեր՝ սկսելով իսկապես միջազգային կարիերա։ Այդ ֆիլմերից են Երզի Սկոլիմովսկու «Ճիչը», Նիկոլաս Ռոուգի «Վատ ժամանակներ», «Էվրիկան» և «Անկարևորությունը» և Նագիսա Օշիմայի «Շնորհավոր Սուրբ ծնունդ պարոն Լորենս»՝ Դևիդ Բոուիի մասնակցությամբ։ 1986֊ին Թոմասը համագործակցել է ռեժիսոր Բերնանդո Բերտոլուչիի հետ «Վերջին կայսրը» ֆիլմի համար, որն արժանացել է ինը ակադեմիական մրցանակների, այդ թվում «Լավագույն ֆիլմ»անվանակարգում, ստացել է նաև բազմաթիվ այլ միջազգային մրցանակներ։ Թոմասը շարունակել է նկարահանել ֆիլմեր, որոնցից են Բերտոլուչիի հետ նրա երեք աշխատանքները՝ «Երկնքի տակ», «Անորսալի գեղեցկություն», «Երազողները» ։
Թոմասը ռազմավարական տեսանկյունից շարունակել է մնալ անկախ պրոդյուսեր, ինչի արդյունքում ստեղծվել են բազմազան և բազմաբնույթ ֆիլմեր, այդ թվում Դևիդ Քրոնենբերգի «Մերկ նախաճաշը», «Վթարը» և «Վտանգավոր մեթոդը», Թաքեշի Կիտանոյի «Եղբայրը», Ջոնաթան Գլեյզերի «Սեքսուալ հրեշը», Դևիդ Մաքքենզիի «Երիտասարդ Ադամը», Թաքաշի Միիկեի «13 մարդասպանները, «Հարա -Կիրի՝ Սամուրայի մահը», «Անմահի սայրը» և «Առաջին սերը», Հոակիմ Ռոնինգի և Էսպեն Սանդբերգի «Կոն- Տիկին», որն առաջադրվել էր Օսկարի, Ջիմ Ջարմուշի «Միայն սիրահարներն են ողջ մնացել», Բեն Ուիթլիի «Բարձրահարկը» և Մաթեո Գարոնի «Սարսափելի հեքիաթներ» և «Պինոկիոն»։
Իր կարիերայի ընթացքում Թոմասն աշխատել է բազմաթիվ նշանավոր ռեժիսորների հետ, որոնցից են Ստեֆանն Ֆրիրսը, Ռիչարդ Լինկլաթերը, Բոբ Ռաֆայելսոնը, Ֆիլիպ Նոյսը, Ուիմ Վենդերսը Քյենցե Նորբուն և Թերի Գիլիամը։
1992-ին Թոմասը նշանակվել է Բրիտանական կինոինստիտուտի նախագահ, իսկ 2000-ին դարձել է մշտական անդամ։
Նա բազմաթիվ մրցանակներ է ստացել, այդ թվում BAFTA-ի Մայքլ Բալքոնի մրցանակը, որը նրան շնորհվել է 1991-ին Կինոյում բրիտանական ակնառու ավանդի համար։ Նա եղել է ժյուրիի նախագահ Տոկիոյի, Սան Սեբաստիանի, Բեռլինի և Կաննի կինոփառատոններում (Un Certain Regard), նաև եղել է Կաննի հիմնական ժյուրիի կազմում։ Նա ավելի քան տասնհինգ ֆիլմ է ներկայացրել Կաննի կինոփառատոնում։ Թոմասը ավելի քան վաթսուն ֆիլմերի պրոդյուսեր է և ներկայումս էլ շարունակում է ֆիլմեր ստեղծել իր Recorded Picture Company ընկերությունում։ Առաջիկայում կթողարկվեն Թաքաշի Միիկեի և Ջուլիեն Թեմփլի հետ նրա աշխատանքները։